Sullii vihttalogi olbmo ledje ikte duorastaga veaigin čoahkkanan Heahttái imaštallat máttasuopmelaš fitnodaga figgamušaid oastit Eanodaga girdigietti. Redstone AERO -fitnodat lei bovden eanodatlaččaid ságastallat girdigietti boahtteáiggi birra.
Fitnodat lea juo álgočavčča sádden gildii oastinfálaldaga, muhto Eanodaga gielddaráđđehus hilggui dan čakčamánu álggus.
Dilálašvuođas bođii čielgasit ovdan, ahte guovllus lea oktasaš vuostemiella gietti vuovdimii. Heahttálaš Pekka Ahopelto lei njuolgut behtton ságastallamii.
– Sii bohtet deike eaige leat ráhkkanan motge hállat iežaset doaimmaid birra. Eai oba muittege mot áššit leat, dadjá Ahopelto.
Ahopelto imaštallá, mo fitnodat lea doaibman 20 jagi ja dat dahká ain dáhpaga jahkásaččat.
– Gal galggašii buorebut čielggadit dán ášši. Ii gánnehivččii boahtit deike.
Gielddaráđđehusa ságadoalli Leena Palojärvi dadjá, ahte muhtumin leamašan maiddái jurdagat vuovdit gietti, muhto dan áigi ii leat dál.
– Gal dat lea muhtumin dieđusge leamašan, muhto ii justa dál, ahte lea dát máilmmi dilli ja visot. Gal mii ieža áigut dan doallat ja geahččat mot dat geavvá dieinna, dadjá Palojärvi.
Eanodaga gielda lei ožžon dieđu dilálašvuođas seamma láhkai go go earátge, namalassii sosiálamedia bokte. Gieldda hálddahushoavda Marja-Riitta Aalto lei čuovvumin ságastallama, ja son gal imaštallá fitnodaga doaibmavugiid.
– Galhan dán áššis leamašan hui miellagiddevaš dat, ahte sis leamašan nu hoahppu dán ášši ovddideamis. Goittot mii diehtit dan, ahte gieldda organisašuvnnas dát ášši ii ovdán nu johtilit, dadjá Aalto.
Oastievttohas šiitá oktavuođaid Ruššii
Restone AERO fálai borgemánus 600 000 euro guovtti Eanodaga gieldda oamastan fitnodagas: Eanodaga girdigiettis, mii vástida girdigiettis doaimmas ja EMF infra Oy:s, mii fas oamasta girdigietti ja dan ráhkkanusaid. Lassin fálaldagas lei vel evttohus, ahte gielda doarjjošii doaimma čuovvovaš gávcci jagi.
Eanodaga gielda goit hilggui fálaldaga guovtti siva dihtii. Eanodaga gielda lea aiddo divodan girdigietti seaivunbána ja girdišilju viđain miljovnnain euroin. Stuorámus sivva hilgumii lei dat, ahte gielda oaččui Lappi lihtu bokte stáhtaveahkkeruđa gietti divvumii. Jus Eanodaga girdigieddi dál vuvdojuvvošii priváhta fitnodahkii, de stáhta bearragoađášii veahkkeruđa ruovttoluotta, oaivvildit Lappi lihtus.
Vaikko Eanodat hilgguide fálaldaga, de Restone AERO ii goit vuollánan ja geahččala ain beassat oastit girdigietti. Fitnodaga vuođđudeaddji ja ságadoalli Esa Korjula jáhkká, ahte sii nákcejit buorebut jorahit doaimma go gielda.
– Eanodat lea bargan buori barggu girdigittiin, go dathan álggahii doaimma aivve guoros beavddis ja johtolat lea lassánan olles áigge. Gal mii goit oaidnit, ahte priváhta fitnodagas leat buoret vejolašvuođat joatkit dán buori barggu, dadjá Korjula.
Vaikko Korjula rámiidage Eanodaga gieldda, de son jáhkká, ahte girdigieddi sáhttá šaddat divrrasin gildii. Korjula oaivvilda, ahte dán gávppis vuoittášedje goappátge oassebealit.
– Min jurddan lea duppalastit johtolaga ja oažžut dan eanet máŋggabealagin. Mii áiggošeimmet maid fuolahit das, ahte badji joatkašuvvá guhkit. Ulbmilin lea bargat hui lagaš ovttasbarggu ealáhusaiguin, vai oažžut Eanodahkii ođđa investeremiid, dadjá Korjula.
Redstone AERO birra leat jorran maiddái ságat, ahte fitnodagas livčče oktavuođat Ruššii. Korjula goit šiitá dákkár dieđuid.
– In ádde gos dákkár šláddarat leat vuolgán johtui. Redstone AERO lea oalát suopmelaš oamastusas. Dás ii leat mielde ruošša ruhta iige oba kiinnálašge. Mii háliidit beassat dinet, muhto gal mii Suoma ášši vuodjit, dadjá Korjula.
Gieddi bálvala turisttaid ja vejolaččat maid soahteveaga
Eanodaga girdigieddi gulai Finavia girdigieddefierpmádahkii jagiid 1988–2021. Jagis 2021 dat sirdásii Eanodaga gieldda oamastussii.
Diibmá Eanodaga girdigieddái bohte vádjit 33 000 mátkkošteaddji ja stuorámus oassi girdimiin bohte Stuorra-Británnias.
Dál guovllus leat gávnnahan, ahte bahčči gusa ii gánnát njuovvat. Mátkkošteaddjimeriid vurdet vel lassánit ja dat bálvala maiddái vejolaččat soahteveaga dárbbuid.
– Iihan dát girdigieddi leat leamašan Eanodaga gieldda oamastusas go golbma jagi. Muhto mas dan goassege diehtá, mii dáhpáhuvvá boahtteáiggis, dadjá Marja-Riitta Aalto.
Gielddaráđđehusa lahttu Jarno Viitanen dadjá, ahte girdigieddi lea gal olu ságastahttán Eanodagas ja máŋgasat gal sávašedje, ahte ovddasvástádus ii livčče šat gieldda hárduid alde.
– Dát oastievttohas ii goit nagodan jáhkihit mu. Eanas dušše hálle čábbáid ovddideami birra ja miljovnnain.
Vaikko Viitanen oaivvildage, ahte ii leat gieldda bargu bajásdoallat gierdigietti, dál ii leat buoretge čoavddus.
– In mun goit oainne, ahte dát oastievttohas livččii dađi buoret molssaeaktu, dadjá Jarno Viitanen.
