Dát lea viehka dábálaš bargobeaivi avvillaš Hannu Aleniusii. Olgoriikalaš lea vuodján badjelgeainnu ja son vuolgá geasehit.
Indonesialaš Gerald Wartin lei bearrašiinnis jođus Anáris Girkonjárgii.
– Geainnu alde lei assás muohtageardi ja biila eambo čeasai čeargamii, čilge son.
Dán dálvvi Aleniusa fitnodagas leamašan ollu bargu geassit biillaid fas luotta ala.
– Geainnuid ortnet leamašan veháš headju, muhto dábálaš dálvesiivvuthan dál leamaš. Eanemus váttisvuođat šaddet olgoriikalaš láigobiilavuoddjiide, geat eai leat hárjánan muohttagii.
Seammá muitala Eemeli Hartikainen. Son bargá Roavvenjárggas sin bearašfitnodagas, mii doaibmá geasihansuorggis olles Lappis.
– Dálvit go bohtet olu olgoriikkain turisttat davás vuojašit láigobiillaiguin, de dat oidno statistihkain. Biillat sáhttet bieđganit ja šaddet vahágat. Dat lasihit geasihandárbbu.
Geasihandárbbuid lasihit maiddái dálkkit.
– Buoláš stirduda biillaid ja šaddet elrávdnjevigit, čilge Hartikainen.
Báikkálaš vurddii iežas biilla geasiheami jándorbeali
Go Marjaana Aikio lei vuodjimin Avvilis ruoktot, deaivvai son báikái, gokko olgoriikalaččaid láigobiillat ledje bisánan geaidnogurrii. Aikio lei vuodjimin daid meattá go biillain nubbi fáhkka jorggihii rastá geainnu čájetkeahttá čuovgga.
– Ii ábuhan eará go jorgalit doaresbeallái. Ballen ahte dáhpáhuvvágo dás mii nu, lihkus ii earágo biilii vehá geavai.
Aikio riŋgii geasihanbiilla vuoddjái ja gulaskuttai vuordináiggi.
– Dat logai ahte son lea Čeavetjávrris ja sus leat vel čieža biilla geasihit Čeavetjávrri ja Anára gaskkas ja vel okta Aŋŋel luoddaearus.
Loahpaloahpas Aikio šattai vuordit biilla geasiheami badjel 12 diimmu. Lihkus ustit lei lahka ja son beasai stobus vuordit geaseheami.
– Leago duođaid nu, ahte báikegotti olbmot galget vuordit go doppe veahkehit olgoriikkalaččaid, son jearrá.
Lihkohisvuođat mannet ovddemužžan bargolisttus
Alenius dadjá, ahte sii eai geahča leago báikkálaš vai turista. Sii vigget bálvalit dáhpáhusortnega mielde.
– Avvilis leat vihtta guhtta geasihanbiilla, de eathan mii juohke báikái geargga dakkaviđe, guhkes gaskkaid dihte olbmot šaddet vuordit.
Lihkohisvuođat gal mannet buot diŋgojumiid ovddabeallái, muitala Eemeli Hartikainen.
– Jus geaidnu lea gitta lihkohisvuođa dahje bártti geažil, dakkárat mannet buot ovddemužžan bargolisttus vai johtolat beassá johtit.
”Gilvaluvvon suorgi”, lohká fitnodatdoalli
Dáhkádusfitnodagain leat iežaset ovttasbargoguoimmit, geain diŋgojit bálvalusaid. Jus geasiheapmi lea diŋgojuvvon dihto fitnodagas, Alenius ii sáhte veahkehit vaikko deaivvašiige vuodjit dáhpáhusbáikki meattá.
Su mielas lea boastut, ahte olbmuide lohpidit jođánis veahki vaikko šaddetge vuorddihit sin máŋga diimmu.
– Sáhtášiihan mis leat eanet ovttasbargu fitnodagaid gaskka, smiehtada Alenius.
Hartikainen muittuha, ahte gánneha álo váldit biilii fárrui liegga bivuid go goassige ii ovddalgihtii dieđe, mii geainnu alde sáhttá geavvat.
– Davvin leat guhkes gaskkat. Dan eai mátkkálaččat álo áddege man guhkes mátkkiid šaddá johtit jusmat biilla ferte fievrridit mearkafuolahussii vaikkoba Avvilis Roavvenjárgii, measta 300 kilomehtera ovtta guvlui.
