Stuorámus oassi sámegielddaid gielddaválgaevttohasain oaivvilda, ahte sámegielat bargiide galgá máksit buoret bálkká. Dát boahtá ovdan Yle válgamašiinnas.
Anára, Eanodaga ja Ohcejoga gielddaválgaevttohasat besse vástidit Yle válgamašiinnas čuoččuhussii sámegielat bargiid bálkká birra.
Válgamašiidnii vástidan Anára gielddaválgaevttohasain 73 proseantta leat dan oaivilis, ahte sámegielat bargit galggašedje oažžut eambbo bálkká. 27 proseantta fas leat dan oaivilis, ahte dálá dilli lea aivve dohkálaš eaige sámegielat bargit dárbbaš bálkká lasi.
Anáris buoret bálkká vuostá ledje eandalitge olgešbellodat Kokoomusa ja vuođđosuopmelaččaid evttohasat. Válgamašiidnii vástidan Kokoomus evttohasain 58 proseantta ledje dan oaivilis, ahte sámegielagiidda ii dárbbaš máksit eanet bálkká.
Ohcejogas maid leat dan mielas, ahte sámegielat bargit juloše oažžut eanet bálkká. Logi evttohasas njealjis leat čuoččuhusain áibbas ovttaoaivilis ja bealli fas vástidii, ahte sii leat oalle muddui ovttaoaivilis. Dušše okta vástideaddjiin oaivvildii, ahte bálkkálassi ii leat dárbbašlaš.
Eanodaga 25 evttohasas válgamašiidnii leat vástidan dušše viđas. Sis njealjis leat dan oaivilis, ahte sámegielmáhtus berre oažžut eanet bálkká. Okta evttohas fas lea sierraoaivilis čuoččuhusain.
Anára evttohasain válgamašiidnii leat vástidan dán rádjai 33 evttohasa. Oktiibuot Anáris leat dáin gielddaválggain 73 evttohasa. Ohcejogas servet gielddaválggaide oktiibuot 30 evttohasa.
Sámegielat bargiide stuorra jearalmas
Sámegielddain leat dálá dilis váttisvuođat fidnet gelbbolaš sámegielat bargiid. Buoret bálkkáin livččiige vejolaš hohkahallat sin ja fállat sámegielat bálvalusaid. Sámi giellalága mielde sámeguovllus sámegielagiin lea riekti iežasgielat bálvalusaide.
Lappi guovlohálddahus lea ođđajagimánus 2025 addán fuopmášuhttima Ohcejoga gildii das, ahte gieldda beaiveruovttuin ii leat oktage gelbbolaš árrabajásgeassima oahpaheaddji. Sámegiela dáiddu gáibideapmi váttásmahttá bargiid oažžuma. Stuorámus oassi mánáin leat sámegielagat. Máŋggat gelbbolaš bargit vulget Norgii buoret bálkká maŋis.
Anára gielddas lea olles áigge dárbu ovdamearkka dihtii sámegielat sadjásaččaide beaiveruovttuide ja skuvllaide. Gielddas leamašan maid hástalusat gávdnat sámegielat skuvlavázzinbagadalliid.
