Ohcejogas leat dál ruohkkamin oaivvi, mo ruhtadit boahtte gease kulturfestivála. Gielddas leat lágidan Ohcejohka šearrá -dáhpahusa jo moadde jagi, muhto dán háve eai leat ožžon ruhtadeami dasa Dáidaga ovddidanguovddážis.
Ohcejoga gieldda astoáiggečálli Gáva Ilmar Kaisa, Kaisa Tapiola-Länsman muitala, ahte sii ledje ohcan 30 000 euro. Dat lea sullii 60 proseantta dáhpáhusa olles bušeahtas.
– Dieđusgehan mii leat ohcan earáge sajiin ruhtadeami, muhto dathan ii leat doarvái jus veardida dasa, maid mii leimmet jurddašan ahte oažžut Dáidaga ovddidanguovddážis.
Ruhtasupmi váilun váikkuha dasa, ahte dán jagi dáhpáhusa ovddideapmi ii lihkostuva. Gáva Ilmar Kaisa dadjá, ahte sii geahččalit goit lágidit váldodáhpáhusa suoidnemánu 5. beaivve Gieddemiellis.
Bivddii veahki báikkálaččain sosiála medias
Gáva Ilmar Kaisa ii báhcán moraštit, muhto čálistii Ohcejoga Facebook-siidui veahkkebivdaga. Das son jearrá gávdnošedjego eaktodáhtolaččat iešguđet bargguide dahje fitnodagat, mat sáhtášedje fállat nuvttá idjasajiid artisttaide dahje skeŋket borramušgálvvuid festiválii.
Okta, guhte veahkkebivdagii vástidii, lea Kaisa Kinnari báikkálaš láibbohagas.
– Leahan dat dieđus stuorra sátsen guovtti olbmo fitnodagas, muhto vásihetne, ahte lea dehálaš ahte dáhpáhus ollašuvvá.
Kinnari ja su isit leaba ovddit jagiid johtán Ohcejohka šearrá -dáhpáhusain miehtá gieldda. Sudno mielas lea buorre, ahte unna gielddas ordnejuvvojit kulturdáhpáhusat.
– Dat lasiha oktasaš vuoiŋŋa ja ovttasbargama. Ja dieđusge dáppe go leat, de lea dehálaš, ahte sámekultuvra beassá oidnosii.
Máŋggat báikkálaččat leat maid fállan iežaset visttiid idjademiid várás, muitala Gáva Ilmar Kaisa.
Fertejit ohcat eará ruhtagálduid
Ohcejoga gielda lea ieš bidjan ruđa dáhpáhusa ordnema várás, ja dat lea ožžon ruhtadeami maid Sámedikkis ja Sámiráđis. Dál fertejit vel gávdnat muhtin eará ruhtagálduid, gos sáhtášii vehá ruhtabihttá goaikkehit.
– Leat vel muhtun ruhtagáldut, main lea cuoŋománu lohppii ohcanáigemearri. Dasto vel jus sáhtán prošeavttaide, mat leat dál jođus, laktit de vejolaččat dain fidne veháš, árvala Gáva Ilmar Kaisa.
Su mielas orru váivi, go dáidagii dahje dáhpáhusaide ii oro dál leamen ruhta.
– In máhte dadjat, ahte mo mii boahttevuođas ordnet daid ja gieldda ruhtadilli lea mii lea. Sáhttá leat ahte goiket min dáhpáhusat.
Ijahis ija mánáidbeaivi ii leat ožžon ruhtadeami
Ijahis idja -musihkkafestiválage ii leat dán jagi ožžon Dáidaga ovddidanguovddážis ruhtadeami mánáidbeaivvi ollašuhttima várás. Mánáidbeaivi lea dál moadde jagi maŋŋálagaid ožžon 15 000–16 000 euro.
Ruhtadeapmi lea geavahuvvon mánáid ja nuoraid linnjabiilasáhtui Anárii sámeguovllu gielddaid skuvllain ja dasto leamaš dasa bálkáhuvvon prošeaktabargi, muitala sámemusihkkaguovddáža plánejeaddji Boles-Ovllá Ovllá Juha Ovllá, Oula Guttorm.
– Dat boahtá čuohcit mánáidbeaivái, muhto diehtu lea oalle ođđa. Mis eai leat vuos čielga plánat ahte mainna lágiin mii mánáidbeivviin bargat.
Ovdal koronaáiggi ii festiválas lean sierra ruhta mánáidbeaivvi lágideapmái, muhto dalle golutge eai lean ná badjin go dál, dadjá Boles-Ovllá Ovllá Juha Ovllá.
Ijahis idja -festivála ollislaš bušeahtta lea sullii 100 000 euro, mas 30–40 proseantta leat veahkkeruđat ja doarjagat. Loahppa gokčojuvvo bileahttaboađuiguin ja eará vuovdimiin.
