Heahtá girkosiiddas lei hušša mannan lávvardaga, go olbmot ledje čoahkkanan Márjjábeaivvi márkaniidda ja čuovvut njoarostangilvvuid. Njoarosteaddjit ledje boahtán miehtá Sámi gilvalit das, ahte gii dat lea dán jagáš suohpangiehta.
Olbmuin lei buorre mokta ja fuolkkit, olbmát ja maiddái ođđa oahppásat gávnnadedje márkanbáikkis.
Anárlaš Heijjá Ánne Elle-Sárá, Elli-Saara Äärelä lea johtán Heahtá Márjjábeivviin mánnávuođa rájes.
– Dál in leat guhkes áigái leamašan dáppe. Dalle nuorran mii gal láviimet juohke jagi leat dáppe, muitala Äärelä.
Márjjábeivviin eai leat máŋgga jahkái šat lágiidan heargevuodjimiid, go Norgga hearggit eai beasa Supmii. Njoarostangilvvut goit geasuhit, maiddái Äärelä ieš njulgii suohpana.
– Dál leat hui olu olbmot boahtán Norggas. Njoarosteamis leat nu buorit vuoittut, de olbmot bohtet. Dáppe orro goit olu olmmoš ja hui somá, dadjá Elli-Saara Äärelä.
Njunnáslaš Eino Ándde Bier’Máhttii, Piera-Matti Ruotsalai Márjjábeaivvit leat jahkásaš árbevierru.
– Mun gal lean measta nu guhká go mun lean eallán, de fitnan dáppe. Leat dieđus muhtin áigodagat, go in leat fitnan. Gal mun oalle dávjá lean leamašan.
Ruotsala lea measta juohke jagi searvan njoarostangilvui ja nu maiddái dán háve.
– Dáppe leat nu buorit njoarosteaddjit, nu alla dássi.
Márjjábeivviin leage stuorra mearkkašupmi oarjjabeale sápmelaččaide.
– Dáppe deaivvadit sápmelaččat, geat eai oainne nu dávjá. Sápmelaččat besset deaivat fulkkiid ja olbmáid, smiehtada Piera-Matti Ruotsala.
Dolin Márjjábeaivvit biste olu guhkkit
Gárasavvonlaš Gáijjot Piera Ándde-Ovllá, Antti-Oula Juuso muitá bures nuorravuođa Márjjábeivviid.
– Orrot gal vehá unnon dát doalut, maid mun muittán dalle go lean nuorran leamašan. Dat ledje njealji viđa beaivve doalut.
Juuso muitala, ahte vássán dálvi leamašan garas boazodolliide goavvejagi dihte. Vaikko olbmuid ságat leatge jorran Márjjábeivviin olu guohtundili ja bohccuid birra, de lea dilli maid bosihit ja háleštit suohttasit áššiid.
– Gal dat somá lea, ahte olmmoš ii dárbbaš jurddahallat aivve dan eallinvuogi birra. Dákko leat dat Márjjábeaivvit nai, ii doppe ábut moraštit, dat ferte bogostallat, dadjá Antti-Oula Juuso.
Hætta ja Utsi dán jagáš suohpangieđat
Márjjábeivviid árbevirolaš njoarostangilvui serve lagabui 100 njoarosteaddji. Dán jagi nissonat ja dievddut njoarostedje lihkadeaddji stoalppuide vuosttas geardde iežaset luohkáin.
Lágideaddjiiid mielde dát soittiige váikkuhit dasa, ahte gilvu geasuhii earenomáš ollu oasseváldiid. Dán vuoro vuoittut manne Norgga beallái.
Dievdduid njoarosteami vuittii Mikkel Mathis Hætta Ábboráššas, nubbin bođii Nils Henrik Labba Sárevuomis ja goalmmádin Per Johannes Eira Beaskáđasas.
Nissoniid Suohpangiehta-gilvvu fas vuittii Fieddara orohaga Elen Solbritt Utsi. Nubbin bođii Elle Májja Eira Beaskáđasas ja goalmmádin Elena Skum Spalccas.
