Duorastaga álgá skuvlabálggis Anára girkosiidda skuvllalaččain ođđa skuvlavisttis. Rektor Marja Seilonen muitala, ahte mánát ja ollesolbmotge leat jo guhká vuordán dan.
– Oahppit leat sihkkarit movttegat, go besset sadjásašlanjain deike ođđa skuvlii ja skuvlašilljui stoahkat. Galhan dat lea somá, dadjá Seilonen.
Skuvla lea doaibman máŋga jagi sadjásašlanjain, go boares skuvlavisttis ledje sisáibmováttisvuođat. Boares skuvlla burge eret ja dan sadjái lea dál ceagganan ođđa visti.
Ođđa skuvlla šilljui leat ceggen fiinna gorgŋodan- ja eará stoahkanstellegiid. Siste hakso muorrahádja, ođđa seainnit ja láhttit dušše čuvget go lávke sisa vistái. Maŋimuš beivviid vel ovdal čavčča vuosttas skuvlabeaivvi leat bargoalbmát stellemin skáhpiid ja lámppáid.
Seilonen goittot lohpida, ahte skuvlabargu álgá ođđa skuvlavisttis.
– Vaikko dál orru, ahte leat vel olu barggut gaskan, de duorastaga goit vuođđoluohkkálanjat leat ortnegis ja lihkus lea dán vahkkui lohpidan fiinna dálkki, de sáhttit leat maid olu olgun.
Nuorat leat vuordán lihkadansajiid
Nuppu-Maaria Näkkäläjärvis ja Áile-Saara Harjulas lea álgimin dán čavčča maŋimuš jahki vuođđoskuvllas. Soai geargaba vel jagi vázzit áibbas ođđa skuvlavisttis.
Näkkäläjärvi lea vuordán albma lihkadansajiid go gilis ii dakkár leamašan guhkes áigái anus.
– De leat vehá earálágan lihkadandiimmutge.
Harjula fas vuordá oaidnit, makkár skuvla orru muđui.
– Várra min luohká ja dasto doppe leat vissásit hui olu buot soffát ja nu.
Máŋggat doaimmat ovtta sajis
Anára čuvgehusdoaimmajođiheaddji Ilkka Korhonen muitala, ahte ođđa skuvlla plánemis leamašan ulbmilin máŋggabealat doaimmat ja danin lanjaid sáhttá heivehit dan mielde, masa daid dárbbaša.
– Mis leat ovdamearkan olu unna sámegielat oahpahusjoavkkut. Anára skuvllas leat sullii 150 oahppi. Dan lassin mii sávvat, ahte skuvlavistái livčče dárbu maid skuvlaáiggiid olggobealdege.
Ođđa skuvlavisttis leat skuvlalanjaid lassin maid lihkadanhálla, álšasále, nuoraidlanjat ja Lappi buresveadjinguovllu dearvvasvuođadállu.
Oahppiid vánhemiin lea vejolašvuohta beassat oahpásmuvvat ođđa skuvlii álgočavčča.
– Mii geahččalat ordnet vánhemiideahkeda nu jođánit go vejolaš dál čakčat. Almmuhan dasto dárkilut áiggi vel, muitala rektor Marja Seilonen.
Virggálaš ođđa skuvlla rahpandoalut leat vel ovdal čakčaluomu.
Anára ođđa skuvlavisti lea 3 900 njealjehasmehtera viiddis ja lea boahtán máksit sullii 12 miljovnna euro.
